Kandidati për kryetar të Prishtinës, Uran Ismaili, tha se çështja e logos së partive është e parëndësishme për qytetarët, sepse ajo që bën dallimin është aftësia dhe përgatitja e kryetarit për ta menaxhuar qytetin. Ai theksoi se logoja e PDK-së është e pranishme në çdo ngjarje dhe aktivitet të tij, por se nuk është logoja ajo që i sjell zgjidhje kryeqytetit.
Sipas Ismailit, Prishtina sot nuk po i plotëson nevojat më elementare, pavarësisht se është qeverisur ndër vite nga parti të ndryshme. Për të, thelbësore është kush e udhëheq qytetin dhe a ka ai përvojën e duhur menaxheriale për të ofruar zgjidhje reale.
Ai shtoi se rikthimi i kësaj teme nga kundërshtarët politikë ndodh vetëm në kohë zgjedhjesh, por qytetarët tashmë po e kuptojnë se dallimin nuk e bën logoja e partisë, por individi. “Sa më shumë që rritemi, aq më shumë shtohen sulmet, por ne nuk kemi ndërmend të ndalemi,” tha ai.
