Pak kohë para se të dalë në konferencë për media për të treguar se do t’i drejtohet Gjykatës Kushtetuese në prag të përfundimit të afatit 30 ditësh të përcaktuar nga kjo e fundit përmes aktgjykimit të 26 qershorit, presidentja Vjosa Osmani ka zhvilluar takim me diplomat të akredituar në vend.
Pas takimit me të ngarkuarën me punë në Ambasadën e Shteteve të Bashkuara, Osmani ka takuar edhe ambasadorin e Mbretërisë së Bashkuar në Kosovë, Jonathan Hargreaves.
Bëhet e ditur se bashkë folën për zhvillimet e fundit politike e rëndësinë e respektimit të rendit kushtetues.
“Gjatë takimit u diskutua për zhvillimet më të fundit politike në vend, me theks të veçantë në rëndësinë e respektimit të rendit kushtetues dhe hapat e mëtejmë drejt konstituimit të Kuvendit, pas aktgjykimit të Gjykatës Kushtetuese”, thuhet në njoftimin e Presidencës së Kosovës rreth takimit që Osmani ka pasur me diplomatin britanik.
