Kryeministri i Republikës së Kosovës, Albin Kurti, zhvilloi sot një vizitë ngushëlluese në familjen e rreshterit të Policisë së Kosovës, Muhamed Lika, i cili u vra më 1 prill 2025 në hyrje të ndërtesës ku banonte.
Në këtë vizitë, Kurti u shoqërua nga ministri i Punëve të Brendshme, Xhelal Sveçla, dhe zëvendësministri i Mjedisit, Planifikimit Hapësinor dhe Infrastrukturës, Jeton Raka.
Gjatë takimit me familjarët, Kryeministri Kurti shprehu dhimbjen dhe solidaritetin e qeverisë me familjen Lika, duke vlerësuar lart kontributin e rreshterit në shërbim të rendit, ligjit dhe sigurisë publike, si dhe angazhimin e tij si ish-luftëtar i Ushtrisë Çlirimtare të Kosovës për çlirimin e vendit.
Kurti u zotua se do të bëjnë gjithçka për të zbardhur këtë rast dhe për të sjellë para drejtësisë autorët e kësaj vepre kriminale.
Në librin e ngushëllimeve, Kurti shkroi:
“Rreshteri Muhamed Lika ka punuar e kontribuar shumë për rendin e ligjin, paqen e sigurinë e qytetarëve dhe shtetit tonë. E para kësaj, është angazhuar e ka kontribuar si luftëtar i UÇK-së për çlirimin e popullit dhe vendit tonë. Vrasja e tij do të ndriçohet e kriminelët tinëzarë do të gjykohen e dënohen. Emri i tij do të rrojë e kujtimi për të nuk do të shlyhet.”
