Hashim Thaçi nuk ishte prezent në seancën e sotme në Hagë për shkak të gjendjes shëndetësore. Për këtë arsye seanca gjyqësore u ndërpre, por më pas vazhdoi pa prezencën e Thaçit.
Dhomat e Specializuara në një përgjigje për Gazetën Express nuk folën rreth gjendjes shëndetësore të ish-presidentit “për arsye të privatësisë”, duke shtuar se nuk është e pazakontë që kur të akuzuarit nuk ndihen mirë me shëndet të mungojnë në seanca.
“Seanca e sotme u ndërpre në fillim për shkak të mungesës së z.Thaçi në sallën e gjyqit, por më pas u sqarua nga avokati i z. Thaçi se z. Thaçi kishte hequr dorë nga e drejta për të qenë i pranishëm sot në gjykatë, në përputhje me Rregulloren e Punës dhe Provave. Për arsye të privatësisë, ne nuk mund të komentojmë përtej asaj që është përmendur në seancën gjyqësore publike”, tha një zëdhënës i Dhomave të Specializuara të Hagës.
Ai shtoi se në raste të tilla seancat vazhdojnë edhe kur ia akuzuari heq dorë nga e drejta për të qenë prezent.
“Mund t’ju them se në përgjithësi, nuk ka qenë e pazakontë që të akuzuarit në rastet e ndryshme të mungojnë në seancat individuale nëse nuk ndihen mirë atë ditë. Në raste të tilla, Rregullat parashikojnë që seancat mund të vazhdojnë në mungesë të një të akuzuari nëse ai heq dorë nga e drejta për të qenë i pranishëm”.
Çka u tha në seancë?
Luka Mishetiq, avokat i Thaçit, tha në fillim të seancës se ai është i njoftuar nga sekretarja se Thaçi nuk do të vijë dhe se nuk di asgjë tjetër
Pas kësaj, kryetari i trupit gjykues, Charles Smith III, tha se i është thënë që nuk është mirë me shëndet dhe se duhej të takohej me një mjek, por që as ai nuk ishte në dijeni që ai nuk do të merrte pjesë.
“I vetmi komunikim, që nuk ka qenë mirë nga shëndeti dhe duhej të takohej me një mjek”, tha ai.
Pas kësaj, Mishetiqit iu kërkua që të komunikojë me Thaçin për të kuptuar nëse do të bashkohet apo do të japë leje që seanca të vazhdojë pa praninë e tij.