Katër raste të dhunës nga fëmijët ndaj prindërve u treguan vetëm në raportin e së dielës nga policia.
Një rast është për dy djem në Prishtinë që rrahën nënën e tyre. Edhe një nënë tjetër në kryeqytetu sulmua fizikisht nga i biri. E më agresive ishte njëra në Ferizaj, që pasi e rrahu nënën e saj, ajo i theu edhe orenditë në shtëpi.
Ndërkohë, një djalë nga Prizreni e rrahu dhe e kanosi babain e tij.
Krejt këto raste jo të zakonshme ndodhën në 24 orët e fundit për të cilat raportoi Policia të dielën. Aty nuk u thanë arsyet që nxitën dhunën ndaj prindërve, sidmos nënave.
Kjo dukuri nuk ka qenë prezente në Kosovë, por që ka shenja të rritjes kohët e fundit. Sociologu Labinot Kunushevci vlerëson se ka shumë shkaqe që çojnë deri te ky lloj i dhunës, si rënia e autoritetit të prindërve, por edhe agresiviteti që nxitet nga rrjetet sociale.
Sipas psikologut Ilir Havolli, këto veprime nxiten edhe nga pasoja psikologjike tek bijtë e bijat.
Të dy këta thonë se dhuna familjare ndaj prindërve duhet dhe mund të parandalohet. Por edhe të trajtohet, pasi që ndodh, që të mos përshkallëzohet.
Në raportin e rregullt policor, të dielën në gjithë vendin janë raportuar gjithsej 13 raste të dhunës në familje, të të gjitha llojeve.
