Kadri Veseli, që po mbahej në Qendër të Paraburgimit të Dhomave të Specializuara të Kosovës në Hagë, ka ardhur në Kosovë për të pamen e babait të tij.
Gazeta Online “Reporteri.net” ka siguruar edhe një foto të shtëpisë së Veselit në Mitrovicë, e ku shihet se shtëpia e tij po ruhet nga forca të shumta të EULEX-it.
Reporteri.net merr vesh se ish-kreu i PDK-së nuk po lejohet që të marrë pjesë në të pamen e babait të tij dhe i njëjti po mbahet në shtëpi ku po ruhet nga forca të shumta të EULEX.
Ndryshe, ardhja e Veselit në Kosovë është konfirmuar edhe Dhomat e Specializuara.
“Për shkak të arsyeve bindëse humanitare, Gjykatësi i Procedurës Paraprake e ka udhëzuar Regjistrin që të mundësojë një vizitë nën kujdestari në Kosovë për z.Veseli për të mbajtur zi me familjen e ngushtë. I akuzuari mbetet në ndalim paragjyqësor dhe në ndalim të Dhomave të Specializuara. EULEX-i dhe Policia e Kosovës janë duke i përkrahur Dhomat e Specializuara të Kosovës.”, thuhet në përgjigjen e Speciales.
Babai i Veselit vdiq mëngjesin e së mërkurës pasi i njëjti ishte i sëmurë qe një kohë të gjatë. /Reporteri.net
