Në Klinikën Infektive aktualisht po trajtohen 39 pacientë të prekur nga Coronavirusi, 7 prej tyre me oksigjeno-terapi ndërsa 3 nga këta në gjendje më kritike.
Kështu ka bërë të ditur infektologu Salih Ahmeti për Front Online.
“Janë 7 pacientë në oksigjeno terapi. Të gjithë pacientët që janë në oksigjeno-terapi janë në gjendje të rënd, prej tyre katër edhe pse janë me oksigjeno-terapi janë në një situate premtuese, ata janë në parametra të menaxhueshëm dhe me angazhimet tona dhe mbështetjen profesionale shpresojmë që të kenë përmirësime. 3 prej tyre janë në gjendje mjaftë të rënd, janë në gjendje kritike”, tha ai për Front Online.
Ahmeti tha se mosha e pacientëve sillet rreth 70 vjeç.
“Mosha e tyre është rreth 70 vjeçare”, tha ai.
Ai tha se pacientët e tjerë në këtë klinikë janë në gjendje stabile.
“39 pacientë janë të shtrirë momentalisht në Klinikën Infektive me Covid-19. Gjendja e pacientëve tjerë është stabile, prej këtyre 7 kanë gjendje të rënd, tre prej tyre gjendje kritike”, tha ai për Front Online.
Mbrëmë është shënuar viktima e gjashtë nga Covid-19 në Kosovë.
Numri i të prekurve ka shkuar në 224, e numri i të shëruarve në 37./Front Online/
