Sipas faqes “Worldometers”, Suedia deri më tani i ka konfirmuar 358 vdekje dhe 6 mijë e 131 raste të infektimeve me koronavirus. Ndërkaq 205 persona janë shëruar dhe janë liruar nga spitalet. Suedia u bë lajm në mediet botërore për mungesën e masave për kufizimin e lëvizjes. Pse po vepron kështu shteti skandinav?
Kryeministri i Suedisë, Stefan Lofven, ka thënë: “Ne të gjithë, si individë, duhet të marrim përgjegjësi. Ne nuk mund të lejojmë dhe të ndalojmë gjithçka. Ka të bëjë edhe me logjikën e përgjithshme.”
“Ne që jemi të rritur duhet të jemi saktësisht kështu, të rritur. Të mos përhapim panik apo thashetheme. Askush nuk është vetëm në këtë krizë, por secili person e ka një përgjegjësi të madhe”, tha ai, duke shtuar se vendi i ka shumë javë dhe muaj të vështirë përpara vetes.
Ndonëse vendi nuk është në karantinë të plotë, qeveria i ka marrë disa masa për ta luftuar përhapjen e virusit. Është rekomanduar distanca sociale dhe janë ndaluar tubimet me më shumë se 50 persona.
Nga njerëzit është kërkuar që të punojnë dhe studiojnë nga shtëpia kurdo që kanë mundësi, shkruan “Metro UK”, transmeton Gazeta Express.
Sidoqoftë, mbi dy mijë mjekë, profesorë dhe shkencëtarë e kanë nënshkruar një peticion me të cilin i bëjnë thirrje qeverisë për të marrë masa më të ashpra kundër koronavirusit.
Profesoresha Cecilia Soderberg-Naucler, hulumtuese e imunologjisë ndaj viruseve në Institutin karolinska, tha: “Qeveria po mendon se nuk mund ta ndalë virusit, prandaj ka vendosur t’i lë njerëzit që të vdesin. Ata nuk duan t’i dëgjojnë të dhënat shkencore që u prezantohen.”
