Sipas të dhënave të universitetit “Johns Hopkins”, rreth 598 mijë persona janë infektuar me koronavirus në mbarë botën, ndërsa mbi 27 mijë e 700 kanë vdekur. Virusi i ri është përhapur në 177 shtete dhe rajone.
Komisioni Kombëtar i Shëndetësisë në Kinë njoftoi të shtunën se janë shënuar 54 raste të reja të infektimeve të premten, por të gjitha kanë qenë të lidhura me shtetet e tjera. Një ditë më parë u shënuan 55 raste.
Një mjek iranian ka thënë se qindra persona kanë vdekur dhe mijëra të tjerë janë helmuar nga alkooli i falsifikuar pasi besonin se kjo pije e vret koronavirusin, shkruan “The Guardian”, transmeton Gazeta Express.
Koreja Jugore e ka raportuar numrin më të madh të rasteve të reja brenda një jave. Të premten, zyrtarët i konfirmuan 146 raste të reja. Shteti i largët aziatik po shënon rritje të numrit të rasteve të importuara nga Evropa dhe Shtetet e Bashkuara.
Më shumë se gjashtë mijë persona me koronavirus janë shtrirë në spitalet e Nju Jorkut, ndërsa gati 1600 prej tyre ndodhen në sektorët e kujdesit intenziv. Shtetet e Bashkuara tashmë ndodhen në vendin e parë në botë për numrin më të lartë të personave të infektuar.
