Ministri i Jashtëm, Glauk Konjufca, thotë se Qeveria e Kosovës nuk e përshëndet emërimin e ministrit të Jashtëm të Sllovakisë, Mirosllav Lajcakut për t’u marrë me dialogun Kosovë – Serbi. Përvec kësaj, Konjufca thotë se është e papranueshëm që Kosova të jetë në një pako me Bosnjën e Hercegovinën.
Konjufca po raporton për herë të parë para Komisionit parlamentar për Punë të Jashtme. Ai ka treguar se është takuar dy herë me Lajcakun, të cilin e ka emëruar Përfaqësuesi i Lartë i BE’së, Josep Borrell. Konjufca thotë se është e papranueshme për Kosovën fakti që BE’ja ia ka caktuar Lajcakut për t’u marrë me Kosovën dhe me Bosnjën. Ai thotë se Kosova nuk pranon të shihet si Bosnja.
“Dy herë e kam takuar z. Lajcak, Ne ia kemi bërë me dije z. Lajcak, që është shumë e rëndësishme të krijohet një konsensus nacional. Hapi i parë i Qeverisë Kurti do të jetë konsensusi nacional mes spektrit parlamentar. E dyta, është paknaqësia jonë, nëse përzihet Kosova me Bosnjën në të njëjtën pako. Për Republikën e Kosovës është e rëndëisishme që Kosova të jetë një entitet i vecantë”, ka thënë Konjufca.
“Ne ia kemi bërë të qartë z. Lajcak. Kosova nuk ka pse të jetë në një pako me Bosnjën. Ne nuk duam të jemi si Bosnja në organizmin e brendshëm”, u shpreh ai.
Konjufca thotë se Qeveria e Kosovës nuk është e kënaqur që BE’ja ka emëruar Borrellin, që vjen nga Spanja dhe Lajcakun, që vjen nga Sllovakia, për të lehtësuar dialogun mes Kosovës e Serbisë.
“Nuk mund ta përshëndesim faktin që Lajcak vjen nga një shtet që nuk e njeh, as si Qeveri e as si Ministri e Jashtme. Nuk është një rrethanë lehtësuese për Kosovën. Nuk mund të jetë kombinatorika më e mirë edhe z. Borrell edhe z, Lajcak, që vijnë prej shteteve që nuk e njohin Kosovën, të caktohen për dialogun e Kosovës me Serbinë”, ka thënë kryediplomati kosovar.
