Pas publikimit të ekspertizës për rastin e Astrit Deharit, Lëvizja Vetëvendosje ka dalë me një konferencë të jashtëzakonshme për media. Sami Kurteshi nga VV-ja ka përmendur një kronologji të këtij rasti, shkruan Gazeta Express.
Kurteshi duke filluar nga sulmi në Kuvend të Kosovës, për të cilën u akuzuan aktivistët ka përmendur edhe arrestimin e tyre, pak muaj më vonë.
“Unë do të fokusohem në kronologjinë e rastit dhe ky rast ka filluar në vitin 2016 me katër gusht, kur kishte një sulm në Kuvend të Kosovës, prej datës 5 gusht sipas policisë janë hetuar katër persona të tjerë në lidhje me rastin, një kohë e gjatë ka shkuar duke i fshehur autorët e vërtetë të sulmit. Më 1 shtator ishte caktuar protesta e opozitës së atëhershme në lidhje me çështjet politike që ishin të ngritura. Një muaj më vonë më 29 gusht policia në orët e hershme të mëngjesit arrestoi gjashtë aktivistë të VV-së. Ky arrestim pasoi me shumë deklarata dhe shumë intervista dhe paraqitje mediale të rrufeshme të personave të caktuar duke bërë përpjekje që t’i fajësojnë aktivistët e VV-së”, ka thënë ai.
I njëjti ka shtuar se sipas ekspertizës ka hyrë një person i tretë për të kryer vrasjen e Astrit Deharit.
“Si duket kanë hyrë persona të tretë që kanë kryer vrasjen e kurrë s’janë deklaruar për këtë çështje.
Aktivistët e VV-së janë dënuar me burgim me kohë zgjatje 21 vjet së bashku të gjithë. Është konstatuar edhe nga prokurori edhe nga Gjykatësi, është dëshmuar se asnjë provë e vetme nuk dëshmon për përzierjen e aktivistëve të VV-së mbi sulmin mbi Kuvendin. Këto janë të gjitha ato që kanë ngja tani e 18 muaj nga Gjykata nuk ka asnjë lajm. Ju e keni dëgju sot interpretimin e analizës së institutit ligjor, ai thotë qartë se kemi të bëjmë më vrasje”, ka thënë ai.
