Ka përfunduar numërimi i të gjitha votave në zgjedhjet e 6 tetorit në Kosovë.
Sipas rezultatit të zgjedhjeve, Lëvizja Vetëvendosje është fituese e zgjedhjeve me 25,49 për qind të votave, shkruan lajmi.net.
Lidhja Demokratike e Kosovës ka mbi 5000 vota më pak sesa Lëvizja Vetëvendosje ose 24,82 për qind, pasuar nga Partia Demokratike e Kosovës që ka mbledhur 21,23 për qind të votave.
Aleanca për Ardhmërinë e Kosovës dhe Partia Socialdemokrate në koalicion, së bashku kanë mbledhur 11,58 për qind të votave të përgjithshme.
Nisma Socialdemokrate nuk ka arritur të kalojë pragun zgjedhor prej 5 për qind, duke mbledhur kështu 4,96 për qind të votave.
Ajo që vlen të theksohet është se ende nuk është bërë numërimi i votave me kusht dhe atyre me postë, por që nuk pritet të ketë ndryshim të madh në rezultate.
Sipas këtyre përqindjeve të fituara në zgjedhje, në Kuvendin e Kosovës do të kemi 5 parti shqiptare, duke llogaritur 3 partitë e mëdha dhe koalicionin AAK – PSD.
Bazuar në votat e fituara, Lëvizja Vetëvendosje pritet t’i ketë 30 ose 31 deputetë në Kuvendin e Kosovës, ndërsa Lidhja Demokratike e Kosovës pritet të ketë një deputet më pak, 29 ose 30 sosh.
Partia Demokratike e Kosovës, do t’i ketë 25 ose 26 ulëse në Kuvendin e Kosovës, ndërsa koalicioni AAK – PSD pritet t’i ketë 14 deputetë.
