Shefi i shtabit të LDK-së për zgjedhjet e 6 tetorit, Lutfi Haziri, ka thënë se janë të hapur për koalicion parazgjedhor me Lëvizjen Vetëvendosje. Por ka deklaruar se nëse ekziston vullneti politik mes LDK-së dhe VV-së nuk duhet të jetë problem emri i kryeministrit.
“Për koalicion parazgjedhor jemi të hapur, kemi emrin tonë, kandidatin tonë, do t’i kemi listat tona. Opsionin e bashkëpunimi do ta ndajmë fer sipas votës politike që kemi. Qëllimi është të bëhet listë e çështjeve të përbashkëta që këtij vendi t’i kthehet shpresa, ekonomia, siguria dhe të luftohet krimi i organizuar. Nëse ka vullnet politik pse duhet emri i kryeministrit të jetë problem? Në LDK ka vullnet të sinqertë”, ka thënë Haziri.
Në pyetjen nëse Haziri do ta pranonte për kryeministër liderin e Vetëvendosjes, Albin Kurtin, ai në Info Magazine është përgjigjur: “E pranoj Vjosa Osmanin”.
“Në çdo situatë vlerësimi im është që Vjosa Osmani i fiton zgjedhjet. Me Vetëvendosjen bashkë i fiton më sigurt. Vjosa Osmani do të shkojë drejt suksesit dhe rikthimit të LDK-së”.
“Kemi hapë derë të madhe të bashkëpunimit. Ne nuk kemi politika opsionale. Opsionin e parë e shohim Vetëvendosjen me të cilën shohim që ta bëjmë ndryshimin në këtë vend. LDK nuk është parti e sotme. Bashkëpunimi me VV është i pashmangshëm. Kësaj here mund të quhet mundësi e humbur, nuk do të doja që ishte mundësi e humbur”, ka deklaruar Haziri./Sinjali/
