Kryetari i Mitrovicës së Jugut, Agim Bahtiri, ka zyrtarizuar sot kalimin e tij nga AKR në Lëvizjen Vetëvendosje.
Ai ka thënë në Info Magazine në Klan Kosovës se kjo është dita më e veçantë për të.
“Këtë ditë s’e kam menduar asnjëherë, por erdhi koha që këtë vendim ta marr me plot bindje dhe nga thellësia e zemrës”.
“Lëvizja Vetëvendosje është një subjekt që asnjëherë s’e ka qeverisur vendin. Lëvizja në krye me Albin Kurtin do ta mbrojë çdo pjesë të territorit të Republikës. Kjo qeveri që do të vijë do të ballafaqohet direkt me shtetin e Serbisë për përcaktimin e kufijve”.
Bahtiri tha se asnjë pozitë as nuk e ka kërkuar dhe as nuk do ta mbajë në partinë e re.
“Kam ardhur t’i ndihmoj vizionit të Albin Kurtit – vizion të cilin e ka që disa vjet. Këtij vizioni i besoj dhe do ta përkrah fuqishëm 24 orë për të ardhur në pushtet dhe për t’i zbardhur të gjitha ato projekte që asnjë parti s’i ka bërë”.
Ai me shumë siguri ka ritheksuar se Vetëvendosja nuk do ta pranojë asnjë koalicion pa qenë në krye lideri i këtij subjekti.
“Kësaj radhe qytetarët duhet ta votojnë Albin Kurtin për kryeministër të vendit”.
