Deputeti i Partisë Demokratike të Kosovës (PDK), Hajdar Beqa ka thënë se nuk është arrestuar asnjëherë në jetën e tij, teksa ka reaguar ndaj një fotografie të publikuar në Facebook nga një faqe e quajtur “LDK për Kosovën” disa ditë më parë, në të cilën shihet deputeti si i arrestuar.
Beqa, në një prononcim për Insajderin të shtunën, ka thënë se fotografia në të cilën shfaqet ai si i arrestuar nuk është e vërtetë. Ka thënë se bëhet fjalë për një tentim të njollosjes së figurës së tij, nga “njerëz që mundohen të bëjnë shantazhe”.
“Ky është një tjetër tentim, në vazhdën e njerëzve që tentojnë të bëjnë shantazhe dhe të njollosin emrin tim”, ka thënë Beqa për Insajderin. “Kjo lloj fushate nuk i bën mirë askujt dhe për këtë të pavërtetë unë do t’i drejtohem organeve të drejtësisë”.
I pyetur nëse ka qenë i arrestuar ndonjëherë në jetën e tij, deputeti Beqa ka deklaruar se ai “nuk është ndodhur kurrë më parë në një situatë të tillë”.
“Sa i përket fotografisë, është krejtësisht e pavërtetë. Unë asnjëherë në jetën time nuk kam qenë në një situtatë të tillë. Madje, nuk kam qenë asnjëherë i arrestuar. Po të kisha qenë i arrestuar, do të tregoja”, ka thënë Beqa.
Ai nuk ka përmendur emra individësh apo grupesh politike, mirëpo ka pohuar se fotoja është prodhuar nga “kuzhina të caktuara me porosi të caktuar”, që sipas tij, është njollosja e emrit të tij.
Hajdar Beqa, i arrestuar nën dyshimin për përfshirje në një rrahje. Këto janë informacionet që shfaqen në një imazh të deputetit të Partisë Demokratike të Kosovës (PDK), e cila është publikuar në Facebook nga një faqe e quajtur “LDK për Kosovën”.
Rasti misterioz që e përfshin Beqën në një rast të dyshuar për “lëndim të lehtë trupor” nuk është raportuar asnjëherë më parë, por disa ditë më parë është publikuar në Facebook nga faqja e rrjetit social Facebook, “LDK për Kosovën”.
“Ky është avokati i Hashim Thaçit”, shkruan ‘LDK për Kosovën’ në përshkrimin e fotografisë, e cila besohet se ishte shkrepur në vitin 2004.
