Erdhi 9 prilli i 20’të dhe Albani vjen te vendi që gjithmonë i sjell dhimbje.
Te ky varr mes dëshmorësh, 28 vjeçari kujton nënën e tij, Mukadeze Lika Muhaxheri që u vra si luftëtare e Ushtrisë Çlirimtare të Kosovës më 1999.
Malli për të ëmën që e la 8 vjet e tri motrat e tij, shtohet çdo herë.
“Është një nënë që ka lënë katër fëmijë. Kontributi i saj çdo herë pa dyshim që çmohet lart”.
Me plot dhimbje e dashuri për ushtaren e tij që e la të ve me katër fëmijë e kujton edhe Agim Muhaxheri.
“Është vrarë në atë shtëpi”, thotë ai, derisa e shikon vendin ku ra dëshmore gruaja e tij.
Ai tregon se si ajo kishte marrë vendim për t’u bërë pjesë e Ushtrisë, ani pse bashkë me katër fëmijët kishin mësyrë Maqedoninë, për të ikur nga vendi.
“Ndërkohë tha po vi edhe unë dhe fëmijët u gëzuan t’u thanë që po vjen edhe mami. Por në moment është ndal, dhe tha mos ma prish qefin Agim”, kujton ai.
E largësia ia bëri Agimit më të madhe dhimbjen kur dëgjoi për vdekjen e saj.
Ajo ishte edhe ekonomiste.
“Kanë thanë mas pari zoti t’i merr mendtë dhe takatin, se unë nuk e kisha lënë kurrë. E kisha ngreh deri në Shkup, por ja që ndodhi” thotë ai.
Tani pas 20 viteve, familja është krenare me veprën e saj dhe shpirtin luftarak.
