Inspektorati Policor i Kosovës përmes një komunikate dërguar mediave ka njoftuar se avokati Gazmend Halilaj, i cili e ka denoncuar në polici rastin e vajzës nga Drenasi (A.G) që dyshohet se u keqtrajtua sekaualisht nga një profesor dhe një polic hetues, është intervistuar sot nga prokuroria në cilësinë e të dyshuarit.
“Avokati ka qenë i ftuar për intervistim nga Prokuroria Themelore në Prishtinë dhe i njëjti është intervistuar me autorizim të prokurorisë në objektin e Inspektoratit Policor të Kosovës në cilësinë e të dyshuarit”, tha IPK, transmeton Gazeta Express.
I njëjti është intervistuar si i dyshuar për veprat penale “Keqpërdorimi i pozitës apo autoritetit zyrtar “ dhe “Keqpërdorimi seksual duke keqpërdorur pozitën, autoritetin apo profesionin”.
“Intervistimi i avokatit Halilaj është vazhdimësi e veprimeve hetimore duke ju referuar rastit që IPK është duke e hetuar në koordinim të plotë me Prokurorinë Themelore të Prishtinës e ku deri tani janë arrestuar tre të dyshuar”, tha IPK.
Sipas autorizimit të prokurorit hetimi ndaj të njëjtit do të vazhdoj në procedurë të rregullt”, thuhet tutje në komunikatën dërguar mediave.
Ndryshe, ndaj profesorit e policit është shqiptuar një muaj paraburgim si dhe ndaj mjekut ku vajza kreu abortin është shqiptuar arrest shtëpiak.
