Sipas një raporti të ri të Kongresit, Shtetet e Bashkuara po përpiqen që me procedura të përshpejtuara t’i japin Arabisë Saudite teknologji të armëve bërthamore.
Një panel i udhëhequr nga politikanët demokratë ka kërkuar që të fillojnë hetimet për planet e Shtëpisë së Bardhë për të ndërtuar reaktorë bërthamorë në Arabinë Saudite. Besohet se këto plane mund ta destabilizojnë situatën e sigurisë në Lindjen e Mesme.
Raportohet se plani për zhvillimin e reaktorëve është shtyrë përpara nga kompanitë e afërta me presidentin amerikan. Komisioni i Përfaqësuesve po kërkon që kjo çështje të hetohet për shkak se dërgimi i pajisjeve teknologjike të armëve bërthamore në Arabi Saudite është duke vazhduar.
Përndryshe, president Trump është takuar më 12 shkurt me prodhuesit e energjisë bërthamore për të diskutuar për ndërtimin e centraleve bërthamore në shtetet e Lindjes, përfshirë Arabinë Saudite.
Arabia Saudite thotë se dëshiron t’i zhvillojë burimet bërthamore të energjisë për ta bërë më të larmishëm këtë sektor dhe për ta zgjidhur problemin e rritjes së nevojës për energji, shkruan “BBC”, transmeton Gazeta Express.
