Sipas një hulumtimi, gati një e treta e kompanive britanike janë duke përgatitur plane për t’u zhvendosur nga Britania e Madhe pasi vendi të largohet zyrtarisht nga Bashkimi Evropian në fund të muajit të ardhshëm.
Instituti i Drejtorëve ka njoftuar se 29 për qind e kompanive në një anketë me 1200 kompani besojnë se dalja e vendit nga Bashkimi Evropian paraqet rrezik të madh për veprimtarinë e tyre në Britani të Madhe dhe tashmë kanë filluar ta zhvendosin biznesin e tyre jashtë vendit ose janë duke planifikuar për ta bërë një gjë të tillë.
Më shumë se 10 për qind e kompanive tashmë e kanë filluar veprimtarinë jashë vendit pasi gjasat për dalje të Britanisë nga BE-ja pa marrëveshje po rriten çdo ditë. Shumica e kompanive që po e shqyrtojnë largimin nga vendi janë duke planifikuar t’i hapin zyret në vende tjera të Bashkimit Evropian.
“Nuk mund t’i shmangim pasojat e këtyre zhvillimeve politike. Udhëheqësit e bizneseve po përballen me vendime të rënda për t’i mbrojtur kompanitë e tyre. Ndryshimi është i nevojshëm dhe shpesh edhe pjesë pozitive e të bërit biznes”, ka thënë Edwin Morgan, drejtor i përgjithshëm i këtij instituti.
Disa kompani të mëdha, përfshirë gjigantët “Sony” dhe “Panasonic”, tashmë i kanë zhvendosur selitë kryersore nga Britania e Madhe dhe i kanë vendosur në vende të Bashkimit Evropian, ndërsa të njëjtën gjë janë duke e planifikuar edhe kompanitë tjera, shkruan “The Guardian”, transmeton Gazeta Express.
