Kryeministri i Kosovës, Ramush Haradinaj ka reaguar lidhur me ndalimin e nënkryetarit të Partisë Liberale të serbëve të Kosovës si dhe zëvendësministër në Ministrinë e Kulturës Rinisë dhe Sportit, Boban Stankovic, në pikën kufitare në Merdare, raporton Gazeta Blic.
Haradi naj, përmes një shkrimi në Facebook u ka bërë ftesë autoriteteve serbe që të ndalojnë praktikat tilla të presionit ndaj qytetarëve serb, të cilët sipas tij, duan ta ndërtojnë jetën e tyre në Republikën e Kosovës.
“Vazhdojnë provokimet dhe qasja jokonstruktive e shtetit serb ndaj qytetarëve të Republikës së Kosovës
Sot në pikën kufitare në Merdare, është ndaluar nënkryetari i Partisë Liberale të serbëve të Kosovës si dhe zëvendësministër në Ministrinë e Kulturës Rinisë dhe Sportit, Boban Stankovic. Ai po mbahet nga zyrtarët policorë serb pa asnjë arsye dhe në bazë të informacioneve që kemi ai po merret në pyetje nga zyrtarë të BIA-së serbe”, ka shkruar ai.
Ka shtuar se “Ftojmë autoritetet serbe që të ndalojnë praktikat tilla të presionit ndaj qytetarëve serb, të cilët duan ta ndërtojnë jetën e tyre në Republikën e Kosovës. Kosova është shtet i gjithë qytetarëve të saj dhe ne nuk do të pranojmë që në këtë formë të frikësohen qytetarët tanë” përfundon shkrimin e tij Haradinaj.
