Lajmin për rekomandimin pozitiv të Komisionit Evropian për liberalizimin, presidenti i Kosovës, Hashim Thaçi, e ka cilësuar si një lajm tejet të rëndësishëm për Kosovën.
Në një konferencë të përbashkët me komisionarin e BE-së, Dimitris Avramopolus, Thaçi ka thënë se ky është ndër lajmet më të mira që ka marrë Kosova në këtë dekadë.
“Jam shumë i lumtur të jem me ju në këtë ditë të rëndësishme të Kosovës. Vendimi i sotëm për ta shpallur të përmbushur edhe kriterin e fundit në favor të liberalizimit është ndër lajmet më të mira që kanë pritur qytetarët e Kosovës që një dekadë. Kjo përbën një moment historik”, ka deklaruar presidenti i Kosovës, raporton “Zeri.info”.
Më tej, ai ka thënë se ky proces ka qenë tejet i vështirë për Republikën e Kosovës.
“I nderuar komisioner, ju shpreh falënderimin për gjithë mbështetjen tuaj në ecjen tonë përgjatë kilometrave të fundit. Më duhet ta theksoj që kilometrat e fundit kanë qenë shumë të rëndë për ne. Po jam i lumtur që së bashku kemi arritur në cak”, ka shtuar ai.
Sot sipas Thaçit, fituese është edhe Kosova, por edhe Bashkimi Evropian.
“Lajmi i sotëm e përmbyll një cikël shumë të vështirë të përmbushjes së kërkesave të KE. Siç e kemi deklaruar edhe më herët, Kosova i ka përmbushur të gjitha kriteret për liberalizimin e vizave. Më duhet të nënvizoj që kjo nuk ka qenë një dhuratë, por meritë e punës së vështirë që kemi bërë së bashku”, ka shtuar ai. /Zeri/
