Një delegacion i Lëvizjes VETËVENDOSJE!, me në krye krytarin, Albin Kurti, ishin për homazhe me rastin e 19 vjetorit të rënies se komandantit Ilaz Kodra, si dhe 40 dëshmorëve e 275 martirëve në Vërboc e fshatrat përrreth.
DrenicaPress sjell postimin e Albin Kurtit në Facebook lidhur me vizitë për homazhe në Drenicë:
Me rastin e 19 vjetorit të rënies, sot bëmë homazhe te përmendorja e dëshmorëve të kombit, Hamdi Ferati dhe Isa Ferati, në vendin ku luftuan deri në frymën e fundit, në Likoshan të Drenasit. Ishin të rinj në moshë, Hamdiu 28 vjeç dhe Isa 20 vjeç, kur nën emblemën e UÇK-së dhanë jetën për liri. Përmendorja e tyre është ndërtuar nga familja e tyre.
Nderimet i vazhduam te varrezat e dëshmorëve në Polac e në veçanti te varri i Ilaz Kodrës i cili pikërisht sot e ka përvjetorin e rënies. Bëmë homazhe edhe për 275 martirët e masakruar, shumica e të cilëve janë nga fshatrat Shtuticë e Vërboc, por edhe të fshatrave Tërstenik, Polluzhë, Gllobar, Baks, Dashec…
Para 19 vjetëve kishte rënë edhe dëshmori Ajet Rrukiqi, për të cilin bëmë homazhe pranë lapidarit të ngritur për të në fshatin Vërboc.
Kujtimi e nderimi i dëshmorëve e martirëve të kombit është detyrë e jona, ndaj të kaluarës e për të ardhmen.
\
