Pas ngritjes se aktakuzës për aferën ‘Pronto’, Besim Beqaj, do të shkarkohet nga pozita e ministrit të Ministrisë së Inovacionit dhe Ndërmarrësisë.
Burime të Veriu.info bëjnë të ditur se Besim Beqaj dje ka qenë në zyrën e Kadri Veselit, ku i pari i PDK-së ia ka kumtuar vendimin për shkarkim nga pozita e ministrit.
Portali Veriu.info mëson se Kadri Veseli ka vendosur që në pozitën e ministrit të Ministrisë së Inovacionit dhe Ndërmarrësisë ta emëroj Ardian Sylën, i cili para disa ditësh ishte zgjedhur anëtar në Bordin Mbikëqyrës të ‘Trepçës’.
“Zotimin për reformimin e PDK-së kryetari Veseli është i vendosur ta dërgoj deri në fund. Ai ka marrë vendim që në krye të Ministrisë së Inovacionit dhe Ndërmarrësisë ta emëroj Ardian Sylën, një person që është ekonomist i diplomuar dhe ka përfunduar Master-in në Uniersitetin e Shefildit”, thotë burimi i Veriu.info.
Ardian Syla njihet si person që ka afërsi të madhe me Memli Krasniqin, Blerand Stavilecin dhe Uran Ismailin.
Ndryshe, mbrëmë kryeministri Ramush Haradinaj në emisionin Pressing në T7 ka thënë se sapo të konfirmohet aktakuza ndaj tij, Beqaj duhet ta lirojë pozitën e ministrit.
