Kryetari i kuvendit të Kosovës, Kadri Veseli ka pasur përplasje të ashpër verbale në seancën e sotme me deputetin e LDK-së, Lumir Abdixhiku, raporton zeri.info.
E tërë kjo nisi me deklaratën e Abdixhikut, i cili përmendi listat e fryra të veteranëve, për të cilët është paraparë ndarja e mjeteve financiare pas rishikimit të buxhetit për vitin 2017.
Me këtë rast, Veseli e quajti manipulant Abdixhikun.
“As nuk ke guxim intelektual, as guxim moral. Duhet të kesh kujdes kur të flasësh, me gjëra konkrete. Po jo të aktrosh me gjendjen e sistemit shëndetësor. Për tri vite ai sistem shëndetësor është udhëhequr nga partia që je ti”, ka thënë ai gjatë replikës.
Veseli më tej, pranoi se listat janë fryrë, porse sipas tij, nuk mund të ndëshkohen të gjithë luftëtarët.
“Ti po mendon që janë fryer listat, janë fryer shumë. A e di sa lista janë fryer nga partia juaj? Me qindra veta”, ka thënë ai, duke ftuar prokurorinë që t’i hetojë ato. Ka lista të fryera që janë manipulantë, por ti nuk mund 90% të luftëtarëve t’i fyesh”, ka shtuar ai, raporton “Zeri.info”.
Menjëherë pas kësaj ka reaguar Abdixhiku, me ç’rast tha se Veseli është në panik. Sipas tij, lideri i PDK-së mund të mbahet mend vetëm për dy gjëra të këqija.
“Veseli është në panik. Ti do të mbahesh mend për dy gjëra: që ke qenë në krye të SHIk-ut dhe që një parti të madhe e ke shndërruar në një parti që ka një grusht deputeteësh”, shtoi ai.
Pas kësaj, Veseli tha se do të japë dorëheqje nga kryetari i kuvendit po qe se dënohet dikush nga SHIK-u.
Këto akuza u bënë në seancë e sotme ku po diskutohet rreth rishikimit të buxhetit për vitin 2017, e të cilin nuk e kanë mbështetur partitë opozitare. /Zeri
