Ndeshja e sotme është e veçantë edhe për një tjetër arsye, lamtumira e ish kapitenit të Kombëtares Lorik Cana.
Cana i dha fund karrierës sportive pas Europianit 2016 dhe ndeshjen e sotme do të shkelmojë për herë të fundit topin përpara publikut shqiptar.
Federata Shqiptare e Futbollit do t’i dhurojë një fanellë Canës me numrin 5, numër që e mbajti gjatë gjithë karrierës së tij me Kombëtaren. Po ashtu pritet të ketë banderola në stadium në nder të kapitenit, ku tifozëria shqiptare i shpreh mirënjohjen dhe vlerësimin për kontributin e dhënë për fanellën kuqezi ndër vite.
I veshur me uniformën kuqezi, Cana do të shkelmojë topin e parë nga mesi i fushës pak përpara fillimit të ndeshjes.
Ky pritet të jetë një moment tejet emocionues për cilindo shqiptar, ku ndër vite ishin mësuar ta shihnin Lorikun në fushën e lojës.
Cana zhvilloi 93 ndeshje me Kombëtaren shqiptare, më shumë se kushdo futbollist tjetër, dhe ka arritur të shënojë edhe një gol.
