Kanë kaluar nëntë ditë që kur ka filluar fushata zgjedhore e partive politike për zgjedhjet e 22 tetorit.
E qysh në ditët e para, janë shënuar shkelje të cilat janë adresuar në Komisionin për Ankesa dhe Parashtresa (PZAP).
Që nga dita e parë deri sot PZAP-i i ka pranuar 46 ankesa për shkelje të rregullave të fushatës zgjedhore.
“Prej fillimit të fushatës së zgjedhjeve PZAP-i ka pranuar 46 ankesa. Pretendimet në ankesa janë thyerje e Kodit të Mirësjelljes të LZP-së, respektivisht vendosja e posterave të kandidatëve për anëtarë të kuvendeve komunale në hapësira publike. Pretendime se përkrahës të një subjekti kanë tentuar të pengojnë mbajtjen e tubimeve elektorale të subjektit tjetër etj”, ka thënë për Indeksonline, kryesuesi i sekretariatit të PZAP-it, Mul Desku.
Ai ka thënë se këto ankesa për shkelje të rregullave zgjedhore më së shumti u janë adresuar dy partive politike, PDK dhe LDK.
“Ankesat ju drejtohen subjekteve që janë në garë për zgjedhje, por më se shumti ankesa janë parashtruar ndaj LDK-së dhe PDK-së”, ka thënë Desku.
Fushata zgjedhore do të zgjas deri me 20 tetor. Ndërsa, me 22 tetor qytetarët e gjitha komunave në Kosovë do tu drejtohen kutive të votimit për të zgjedhur kryetarët e rinj dhe asambleistët e kuvendeve komunale.
