Kina ka nisur një projekt me rreth 20 mijë specialistë për ngritjen e Wikipedia-s së saj, transmeton Anadolu Agency (AA).
Sipas një lajmi të “China Daily”, “Kinpedia” e cila po përgatitet nga rreth 20 mijë specialistë nga institutet e universiteteve në mbarë vendin, vitin e ardhshëm do të jetë gati për lexuesit.
Krahas historisë dhe kulturës së vendit në “Kinpedia” do ketë mbi 100 disiplina të ndryshme. Në të do të ketë mbi 300 mijë shkrime, ku secili prej tyre do të përbëhet nga njëmijë fjalë.
Specialistët thonë se informacioni i përgatitur do të merret nga enciklopeditë kineze, ndërsa do të shndërrohet në një enciklopedi dixhitale. Ndërkohë theksohet se ajo “jo vetëm do të jetë si Wikipedia, por do ta kalojë atë”.
Ndërtimi i Wikipedia-s vendase ishte miratuar nga Këshilli i Lartë i Kinës që në vitin 2011, ndërsa për shkaqe të ndryshme realizimi ishte shtyrë.
