“Ç’kemi Diego, uroj të jesh mirë. Faleminderit për sezonin që kaluam bashkë. Paç fat për sezonin e ardhshëm, por nuk je më në planet e mia”.
Ky është mesazhi i shkurtër që e përditshmja spanjolle “AS” ka siguruar, të cilin trajneri i Chelseas, Antonio Conte ia ka dërguar sulmuesit Diego Costa, për të informuar futbollistin se ai konsiderohet tashmë i tepërt për planet dhe kërkesat e “Stamford Bridge”. Përgjigja e Diego Costas ishte asgjë më shumë se një “Ok”, i shkurtër, i thjeshtë dhe i qartë. SMS-ja u zbulua nga vetë Diego Costa, në përfundim të ndeshjes Spanjë-Kolumbi e zhvilluar mbrëmjen e të mërkurës dhe e përfunduar në barazim 2-2. Një ndeshje ishte pjesë e ekipit, por nuk u aktivizua në Murcia.
Te Chelsea nuk janë aspak të lumtur me faktin që Costa ka zbuluar se ai nuk është më i dëshiruar nga Conte, sepse kjo dobëson pozitat e klubit në tratativat që do të realizohen me klube të ndryshme të interesuara për të siguruar shërbimet e sulmuesit të Spanjës. Vlera e Costas, sipas informacionit të Transfermarkt, është rreth €50 milionë euro. Tashmë, pas bërjes publike të situatës dhe konsideratës së klubit të bluve ndaj sulmuesit, konsiderohet shumë e vështirë që Chelsea të mund të arkëtojë atë shumë parash për spanjollin. Ky i fundit shënoi 22 gola në 42 ndeshje me Chelsean në sezonin e fundit.
