Familja 7 anëtarëshe e Skender Asllanit nga Abria e Skenderajt shumë shpejt do të bëhet me shtëpi të re falë ndihmës së bashkatdhetarëve vëllezërve Gashi nga Tërnaci i Skenderajt që punojnë në Gjermani si pronarë të kompanisë Gashi Armierungsbau.
Në vënien e gurthemelit kanë marrë pjesë donatorët humanitarë, deputeti i Parlamentit të Kosovë Bekim Haxhiu drejtori i Shëndetësisë në Komunën e Skenderajt Enver Gashi, këshilltari komunal Latif Smakiqi, si dhe anëtarë të familjes përfituese.
Drejtori i Enver Gashi në emër të Komunës së Skenderajt i ka falenderuar bashkatdhetarët vëllezërit Gashi që po nisin shtëpinë për familjen nevojtare Asllani.
Faleminderime për bashkatdhetarët ka shprehur edhe deputeti Bekim Haxhiu si inicues për ndihmë familjes Asllani, ndërsa donatorët kanë premtuar se shtëpia e nisur sot do të përfundojë më 1 qershor pikërisht në Ditën e Fëmijëve.
Familja Asllani për shkak të pamundësisë ekonomike deri më tani ka jetuar në një hapësirë të papërshatshme dhe pa kushte minimale për jetë normale. Me ndërtimin e shtëpisë se re familja Asllani nga Abria do të jetojë në kushte normale për jetë.
