Në kishën e Shën Abrahamit në Llapushnik të Komunës së Drenasit, ka përfunduar koncerti i muzikës klasike, event ky i organizuar nga Komuna e Drenasit në bashkëpunim me Ipeshkvinë e Kosovës. Në këtë koncert të muzikës klasike, merrnin pjesë, kryetari i Komunës së Drenasit, Ramiz Lladrovci, nënkryetari i Komunës, Gani Syla, drejtor të drejtorive komunale, deputet të Kuvendit të Kosovës, ambasador të ambasadave në Republikën e Kosovës, imzot Dod Gjergji e Don Lush Gjergji dhe shumë qytetarë të tjerë. Ndërsa në koncertin e muzikës klasike merrnin pjesë, Lule Elezi, pianiste, Antonio Gashi, violonçelist dhe Adelina Paloja, soprano.
Fillimisht, kryetari Lladrovci, uroj qytetarët e Kosovës dhe familjarët për kthimin e Ramush Haradinajt duke thënë se është një kthim shumë i vonuar, dhe ndalim plotësisht jo ligjor, mbi baza të aktakuzës së Serbisë që kreu krime në Kosovë. Pastaj kryetari Lladrovci ka përshëndetur të pranishmit duke thënë se Komuna së bashku me Ipeshkvinë e Kosovës, ka organizuar këtë koncert të muzikës klasike që pasqyron më së miri kulturën dhe traditën tonë shekullore. “Komuna e Drenasit do të jetë në vazhdimësi për ruajtjen e bashkëjetesës ndërfetare në vend, Ky event sot, dëshmon më së miri, se ne Drenas ekziston një frymë tolerante, kulturore e fetare”, ka thënë kryetari Lladrovci.
