Piloti britanik i Mercedesit, Luis Hemilton, ka triumfuar në garën e dytë të kampionatit botëror të Formula 1 që u zhvillua sot në Kinë. Në një pistë të lagur nga rreshjet e shiut, ai e nisi garën nga vendi i parë duke qënë se dje në provat zyrtare fitoi “pole position” dhe e ruajti këtë pozicion deri në fund.
Pas tij u rendit piloti i Ferrarit, Sebastian Fetel, i cili gjithashtu ruajti vendin nga i cili e nisi garën. Vendin e fundit në podium e mori piloti holandez i Red Bullit, Maks Vershtapen, i cili bëri një garë mbresëlënëse duke rikuperuar 13 pozicione nga nisja.
Treshen e dytë poshtë podiumit e zunë shokët e skuadrave të pilotëve të sipërpërmendur, me Riçiardon e Red Bullit që doli i 4-ti, Raikonen i Ferrarit i 5-ti dhe Botas i Mercedesit i 6-i.
Pas dy garash, klasifikimi i përgjithshëm për pilotë bashkëkryesohet nga Hemilton dhe Fetel, teksa të dy kanë regjistruar nga një fitore dhe një vend të dytë në dy garat e para të zhvilluara në Australi dhe Kinë. Lufta për titullin kampion sapo ka nisur dhe këtë vit duket se do të jetë mjaft interesante me Ferrarin e rikthyer pretendent pas shumë viteve zhgënjim.
