Fshati Kllodernicë sot ka mbajtur tubim përkujtimor ku janë përkujtuar dëshmorët dhe martirët e këtij fshati dhe lokaliteteve përreth.
Në këtë tubim përkujtimor ka marrë pjesë edhe Nënkryetari i Komunës së Skenderajt me bashkëpunëtorë.
Në fjalën e mbajtur më këtë rast, Nënkryetari Nura ka çmuar lartë kontributin e të rënëve të Kllodernicës, duke theksuar se institucionet lokale të Skenderajt po punojnë çdo ditë të vetëdijëshme për obligimin që kanë karshi atyre që u fliuan në themelet e lirsë dhe pavarësisë së Kosovës. Nura në emër të Komunës së Skenderajt dhe Kryetarit Sami Lushtaku ka shprehur respektin maksimal për të gjitha familjet e dëshmorëve dhe të rënëve.
Kryetari i fshatit Fetah Kajtazi, ka shpalosur para të pranishmëve një historik të shkurtër të fshatit dhe kontributit të tij në histori, veçanërisht gjatë periudhës së fundit të luftës së UÇK-së.
Në fund të këtij manifestimi përkujtimor, nxënësit e shkollës “Migjeni” të Kllodernicës kanë shfaqur një program të pasur artistik. Nënkryetari Nura me bashkëpunëtorët e tij ka bërë homazhe dhe ka vendosur lule pranë pllakës kushtuar të rënëve të Kllodernicës.
