Komisioni për Politikë të Jashtme në Parlamentin e Shqipërisë, ashtu siç kishte paralajmëruar, zhvilloi të mërkurën një seancë dëgjimore me ambasadorin e Republikës së Shqipërisë në Kosovë, Qemal Minxhozi, për t’u informuar lidhur me zhvillimet e fundit në marrëdhëniet midis Kosovës dhe Serbisë, shkruan sot Koha Ditore.
Fillimisht kryetarja e Komisionit, Arta Dade, u shpreh se ngjarjet e fundit mes Kosovës dhe Serbisë janë regres, ndërsa treni serb me simbole nacionaliste është një provokim për Kosovën.
“Ngjarje të cilat përbëjnë regrese lidhur me sigurinë dhe stabilitetin në rajon, siç është dhe rasti i trenit provokues nga Serbia dhe arrestimi i Ramush Haradinajt, me një urdhërarrestim, që vazhdon ta mbajë Serbinë në skemat e vjetra të konfliktualitetit. Komisioni për Politikë të Jashtme vazhdon të mbajë në vëmendje zhvillimet në rajon dhe në mënyrë të veçantë sidomos hapësirën ku banojnë dhe ushtrojnë aktivitetin e tyre shqiptarët”, tha Dade.
