Nisma për Kosovën ka reaguar ndaj PDK-së, pasi sipas saj, kjo parti ka nisur të shtrojë rrugën në fshatin Negroc të Drenasit pa asnjë procedurë për qëllime manipulimi në zgjedhjet e nesërme.
Për Nismën, kjo gjë po bëhet pikërisht në kohën e zgjedhjeve, andaj e konsiderojnë si manipulim dhe blerje e vullnetit qytetar.
Në një reagim të publikuar në faqen tyre në Facebook, Nisma ka publikuar edhe një video ku shihet teksa policia e arreston një person. Ai tenton t’i rezistojë policisë, dhe kështu zyrtarët policorë e kapin atë për krahësh, derisa personi nis të bërtasë.
Sipas Nismës, arrestimi i tij është bërë vetëm për shkak se e ka kundërshtuar shtrimin e rrugës.
Lexoni reagimin e plotë të Nismës, kurse më poshtë mund të shihni edhe videon:
Luftë speciale dhe humbje e arsyes së pushtetit (video)
Sot në fshatin Negroc të Drenasit, siç din zakonisht të veproj pushteti aktual, ku prezenca e tij vërehet vetëm gjatë ditëve të zgjedhjeve, filluan shtrimin e disa rrugëve nëpër lagje pa asnjë procedurë dhe këtë e konsiderojmë tentim shantazhi, manipulim dhe lloj blerjeje e vullnetit qytetar.
Në videon e bashkangjitur, shihet se si në këtë situatë janë involvuar edhe Policia, e cila arrestoi një qytetar vetëm pse kundërshtoi shtrimin e rrugës sipas preferencave politike, i cili në përpjekje e sipër lëndoi këmbën nga makineria e rëndë dhe u dërgua me ndihmë të shpejtë në urgjencë në Prishtinë.
Shtrimi i rrugëve dhe çdo projekt tjetër, dihet se me procedura të rregullta nuk mund të ekzekutohen në kulmin e zgjedhjeve dhe konsiderohet si e pandershme dhe ndërhyrje në proces, aq më pak kur këto bëhen me mjete të dyshimta dhe jo të parapara me buxhetin e komunës, mjete të cilat me siguri punëkryersit pretendojnë t’i marrin në të ardhmen, duke dëmtuar buxhetin e vitit të ardhshëm, siç është bërë edhe më herët me shtrimin e rrugës lokale në Negroc.
Raste të tilla të keqpërdorimit të pushtetit aktual, vërehen anekënd lagjeve dhe fshatrave të Drenasit.
