Kryesuesi i Kuvendit Komunal të Drenasit, Naim Bazaj, i cili së fundmi ka thënë se do të jetë kandidat për kryetar të komunës në zgjedhjet e jashtëzakonshme, ka takuar sot ambasadoren turke në Kosovë, Kivilcim Kiliç, e cila sipas tij i ka ofruar mbështetje nëse ai do të jetë kryetar i ri i komunës.
Por, në njoftimin e shkurtër për takimin të cilin ai e ka shkruar në Facebook, ka një numër gabimesh drejtshkrimore dhe lëshime teknike. Bazaj në disa raste ka përdorur shkronjën “ë” ndërsa në raste të tjera ka preferuar që atë ta zëvendësoje me shkronjën “e”, ka nisur fjalë me shkronjë të madhe në vend ku duhej të ishte e vogël, ka vendosur në mënyrë të gabuar shenjat e pikësimit, dhe për më tepër, shkruan në vetën e tretë tek i referohet vetes e të tjera lëshime.
Bazaj në një intervistë për emisionin “Kontakt” në Tribuna Channel ditë më parë ka thënë se është i bindur se do të jetë fitues në zgjedhjet e parakohshme në Drenas, edhe në rast se nuk kandidohet nga partia e tij, PDK-ja.
“Nëse më kandidon PDK-ja dhe më përkrah qendra, jam i sigurt se 70 % do të marrë vota në komunën e Drenasit, por edhe nëse kandidoj si i pavarur, prapë do të marrë 50 %”, ka thënë Bazaj në emisionin “Kontakt” në Tribuna Channel.
Ai ka thënë se kandidaturën nuk e ka shpallur ai vetë, por qytetarët e Drenasit që e përkrahin këtë ide./Insajderi.com
