Policia e Kosovës ia ka dalë që ta arrestojë të dyshuarin, mashkull shqiptar i Kosovës, shkaktar i një aksidenti me fatalitet i cili gjendej në arrati.
Rasti ka ndodhur më 17 gusht të këtij viti në fshatin Gurrakoc të Istogut. I dyshuari, derisa ishte duke lëvizur me veturën e tij, kishte humbur kontrollin mbi automjetin dhe kishte goditur rrethojën e një oborri, raporton Koha.net.
Si pasojë, lëndime trupore patën pësuar vetë ngasësi dhe një pasagjere femër, boshnjake e Kosovës. Të lënduarit ishin dërguar në spitalin e Pejës, ku dhe ishte konstatuar se pasagjerja nuk kishte shenja jete.
Por, shoferi, siç mësohet, i ka ikur organeve të rendit dhe që nga ajo kohë ka qenë në arrati. Arrestimi i tij ka ndodhur dje, më 8 tetor.
Me vendim të prokurorit, i njëjti pas intervistimit është dërguar në mbajtje.
