Një gjykatë e Romës ka vendosur një dënim shumë të pazakontë ndaj klientit të një prostitute minorene, që përveç dy viteve burg, e ka dënuar që t’i blejë vajzës së re libra mbi dinjitetin e gruas.
Poema të Emily Dickinsonit, romane dhe libra të Virginia Woolfit, Hannah Arendtit apo Anne Frankut figurojnë mes 30 veprave që klienti duhet t’i blejë viktimës si dëmshpërblim moral.
Gjykimi, i marrë nga gjyqtarja Paola Di Nicola, mbyll një hetim të filluar në vitin 2013 ndaj një rrjeti prostitucioni që implikonte vajza të reja të moshës 14 dhe 15 vjeçe, që vepronin në lagjen e pasur Parioli në Romë.
“Adoleshentet përpiqeshin të bënin tregti me trupin e tyre për të blerë rroba të reja apo telefona të fundit”, thuhet sipas hetuesve.
Gjatë një gjykimi të mëparshëm në vitin 2014, një gjyqtar, pasi dënoi organizatorin e rrjetit me nëntë vite burg, kishte përshkruar vajzat e reja si “fëmijë që ishin rrëmbyer nga situatat, pa u menduar shumë, me qëllim fitimin e parave të lehta”.
Gjykimi për klientin e minorenes lë të kuptohet se gjyqtarja ka privilegjuar një dëmshpërblim që do të ndihmojë vajzën të kuptojë se dëmi i vërtet që ajo ka pësuar është ai i braktisjes së dinjitetit të saj femëror.
