Kryetari i Kuvendit të Kosovës, Kadri Veseli, ka thënë se Lista Serbe nuk ka paraqitur kushte për ta votuar marrëveshjen për ratifikimin e marrëveshjes së demarkacionit të Kosovës më Malin e Zi.
Ai këto komente i bëri sot pas mbledhjes së kryesisë së Kuvendit të Kosovës.
“Lista Srbska ka qenë pozitive në Kuvendin e Kosovës dhe nuk kanë paraqitur asnjë kusht, por në të njëjtën kohë asnjë kusht nuk do të vlejë”, ka theksuar Veseli.
Ndërsa, i pyetur se si e komenton deklaratën e deputetit Albin Kurti, i cili ditë më parë tha se “më 1 shtator, përveç që kanë arritur ta ndalin marrëveshjen e Demarkacionit, kanë arritur që ta ndalin edhe luftën”, i pari i Kuvendit ka thënë se “harrojeni punën e luftës, kujt i ka mbetur qejf me luftuar, s`kam çka i bëjë”.
Ai ka thënë se raportet në mes partnerëve të koalicionit, Partisë Demokratike të Kosovës (PDK) dhe Lidhjes Demokratike të Kosovës (LDK) janë raporte të mira, por sipas tij, ajo që duhet fuqimisht të punohet është përmirësimi i jetës së njerëzve në Kosovë.
