Njohës të çështjeve politike në vend, e kanë komentuar deklaratën e të parit të vendit Hashim Thaçi si dhe kryeministrit Isa Mustafa, ku kanë theksuar se demarkacioni me Malin e Zi është kusht edhe për themelimin e ushtrisë së Kosovës.
Sipas tyre, këto deklarata po bëhen sa për t`i hedhur hi syve opinionit publik. Ata theksojnë se kryeministri dhe Presidenti fatkeqësisht e kanë lidhur fatin e tyre politik e demarkacionit.
I kontaktuar nga Gazeta Blic analisti Imer Mushkolaj, theksoi se moskrijimi FAK-ut është dështimi i Thaçit dhe Mustafës. Ai shton se demarkacioni nuk ka kurrfarë lidhjeje me këtë proces.
Mushkolaj vuri në pah se përmes këtyre deklaratave Thaçi e Mustafa përpiqen që dështimet e veta t’ua veshin të tjerëve.
“Vetëm të kujtojmë se sa e sa herë që të dytë kanë dhënë premtime e afate për krijimin e FAK-ut, por gjithnjë kanë dështuar”, shtoi ai.
Kurse njohësi i çështjeve juridike dhe politike Krenar Shala, mendon se Kosovës nuk do t’i hapen rrugët që qytetarëve të saj ti mundësohet udhëtimi në zonën Schengen, përderisa institucionet nuk i intensifikojnë përpjekjet për të luftuar krimin e organizuar të nivelit të lartë.
“Përkundër që demarkacioni është vënë kusht nga Komisioni Evropian për liberalizimin e vizave, mendoj që Kosovës nuk do t’i hapet rruga që qytetarëve të saj t’i mundësohet udhëtimi në zonën Schengen përderisa institucionet nuk i intensifikojnë përpjekjet për të luftuar krimin e organizuar të nivelit të lartë dhe korrupsionin e nivelit të lartë. Mendoj që çështja e demarkacionit është fare e lehtë për t`u zgjidhur: Mali i Zi ka deklaruar që është i gatshëm që të rishqyrtojë marrëveshjen dhe mendoj që kjo është një pikënisje pozitive”, thotë ai për Gazetën Blic.
Ai shton se pala kosovare duhet të shpreh gatishmërinë që të ulet përsëri në negociata me Malin e Zi dhe të dekordohen që marrëveshja në fjalë duhet të dërgohet në Gjykatën Ndërkombëtare të Arbitrazhit.
“Dhe nëse palët merren vesh kështu, atëherë Malit të Zi i hiqet pengesa për të vazhduar me procesin e ratifikimit nga ana e shteteve anëtare të NATO-s të ratifikimit të antarësimit të saj në këtë bllok ushtarak dhe Kosovës, në anën tjetër, do t’i mundësohej që të përmbush këtë kusht të vënë nga ana e Komisionit Evropian për të liberalizuar vizat”, shtoi Shala për Gazetën Blic.
Sipas analistit Shala demarkacioni nuk ka lidhje as me kushtin për themelimin e ushtrisë së Kosovës.
“Është fatkeqësi që kemi një lidership që është duke i vënë pengesa qytetareve të Kosovës vetëm për të shpëtuar politikisht. Mendoj që ushtria e Kosovës mund të themelohet pa pjesëmarrjen e Listës Serbe – duke ndryshuar ligjin për FSK-në”./ Gazeta Blic
