Asgjë nuk është gjetur në pikën e parë të gërmimeve për varrezat e dyshuara në kampusin e Universitetit të Prishtinës.
Lajmin e ka bërë të ditur për Kohavisionin kreu i Komisionit Qeveritar për të pagjeturit, Prenk Gjeta.
Ai ka thënë se sot po vazhdojnë punimet në pikën tjetër, atë mbrapa objekt të Rektoratit të Universitetit të Prishtinës.
Ekspertët vendorë e ndërkombëtarë që nga e mërkura kanë nisur gërmimin për t’i vërtetuar dyshimet se trupa të shqiptarëve u varrosën aty.
Dëshmitarë të shumtë thuhet se kanë deklaruar se gjatë kohës së luftës, kanë parë forca të policisë duke varrosur trupa të të vrarëve në këtë hapësirë.
Prokurori i këtij rasti, Elez Blakaj, ka deklaruar se gërmimet kanë filluar me urdhër të Prokurorisë Speciale nën dyshimet për varrezë masive dhe punimet do të zgjasin aq sa ka nevojë.
