500 familjeve në Vushtrri iu është dëmtuar nga vërshimet shtëpia, ka bërë të ditur në emisionin #gjesi në T7, kryetari i kësaj komune, Xhafer Tahiri, raporton Gazeta Express.
Në një lidhje direkte në T7, Tahiri thotë se këto janë vërshimet më të mëdha që kanë ndodhur në 50 vitet e fundit.
“Vushtria është përballë me vërshimet më të mëdha nga viti 1979. Fatmirësisht nuk kemi pasur pasoja në njerëz”, ka thënë ai.
Tahiri shton se dëmet janë enorme në shtëpi e në toka bujqësore. Ai ka bërë të ditur se janë 500 shtëpi që janë dëmtuar na vërshimet.
“Afërsisht janë diku 500 shtëpi që janë dëmtuar. Pjesa më e madhe e tyre në qytet. Vetëm dje janë evakuuar rreth 100 familje. Ishte fat në fatkeqësi që uji erdhi gjatë ditës e jo gjatë natës sepse do të shkaktoj frikë më e madhe. Familjet ose kanë qëndruar në katet e sipërme ose kanë shkuar te të afërmit”, ka thënë ai.
Në rast se ka nevojë për ata që kanë mbetur pa shtëpi do të lëshohet një shkollë dhe palestra e sporteve.
“Shkolla ‘Naim Frashëri’ e palestra e sporteve do të jenë të gatshme për akomodim”, ka thënë i njëjti.
“Kur ne shpallëm gjendje emergjente civile, kontaktova me z.Ramiz Lladrovca se lumi Drenica ka shkaktuar shumë dëme. Duke ditur pasojat pas 12 orëve shpallëm gjendjen emergjente civile dhe i njoftuam banorët. Po bëjmë vlerësimin e dëmeve prej sot. Ekipet janë të rraskapitur edhe emergjenca edhe vullnetarët edhe zjarrfikësit. Po nëse vazhdon situata kështu, normalisht që jemi të gatshëm. Nuk jemi kursyer se fundja e kemi obligim”, tha Tahiri.
