Zullumi special: Ardhësit izraelitë ua presin, ua djegin e ua nxjerrin me rrënjë ullinjtë palestinezëve
Në fshatin Burin, i shtrirë në periferi të qytezës Nablus në Bregun Perëndimor, Basheer Zaban, bashkë me familjarët e tij, ishte duke vjelur ullinj në ullishtën e vet. Papritmas, ardhës të maskuar izraelitë i sulmuan ata me gurë. Shtatë kilometra larg Nablusit, fshati tashmë është rrethuar nga vendbanimet izraelite, të quajtura Yitzhar.
Përktheu: Nasuf Abdyli
“Nuk mundëm t’i shihnim, sepse ishin fshehur prapa pemëve. Me gurë i bënë cak kokat tona. Ata për pak sa nuk na vranë”, thotë Basheer, familjarët e të cilit u lënduan në këtë sulm.
Në kohën kur Izraeli po vazhdon të ndërtojë vendbanime çifutësh në këtë zonë, fshatrat Burin, Oreef, Madama, Jalood, Aserah al-Qibliah, Aqraba dhe Burqa dhe disa fshatra në verilindje të Nablusit janë bërë caqe të drejtpërdrejta të ardhësve. Ata po i detyrojnë palestinezët që t’i lirojnë tokat e tyre pjellore për të ndërtuar vendbanime.
Sipas një koalicioni palestinez të organizatave joqeveritare, ky vit ishte më i vështiri për fermerët. Mbi 8.400 trupa ullinjsh janë djegur ose janë nxjerrë me rrënjë, shkruan Anadolu, transmeton Gazeta Express.
“Sulmet e ardhësve janë të koordinuara kundër fermerëve dhe vullnetarëve tanë. Ata kanë organizuar sulme vdekjeprurëse deri në atë masë sa një burri të moshuar i është thye kafka”, thotë Jamal Jomah, kryetar i koalicionit të OJQ-ve.
Vuajtjet e fermerëve u shtuan edhe më shumë kur ardhësit ua ndërprenë rrjetin e ujit me të cilin furnizoheshin fshati Madama dhe pronarët e ullishtave.
“Kur ardhësit ekstremistë na sulmojnë, ushtria (izraelite) i përkrah ata duke i qëlluar me armë dhe duke i arrestuar fermerët palestinezë dhe madje edhe ata që solidarizohen me fermerët”, shton Jomah.
Lexo edheHistoria e gruas që gjurmoi anëtaret e bandës kriminale që i rrëmbyen të bijën
Fermerët palestinezë nuk guxojnë më që t’i vizitojnë ullishtat vetëm. Ata shkojnë në grupe dhe me vete marrin mburoja për t’u mbrojtur nga sulmet me gurë.
Shawqi Abu Mujahed thotë se ardhësit edhe ua vjedhin kokrrat e pjekura të ullirit. “Ardhësit na i vjedhin pemët e pjekura. Ata gjithashtu i presin trupat e pemëve dhe na i vjedhin pajisjet për të na e sulmuar burimin e jetesës”, ankohet ai.
Sipas Nazeh Fkhaida, drejtor i Departamentit Palestinez për Dokumentimin e Dëmeve Bujqësore, numri i përgjithshëm i trupave të pemëve që janë nxjerrë me rrënjë, që janë djegur ose që janë helmuar kimikisht nga ardhësit nga viti 2010 ka shkuar në 101.988, që paraqet dëm prej 47 milionë dollarësh.
Organizatat joqeveritare kanë nisur një fushatë për t’i ndihmuar fermerët e dëmtuar, por kjo nismë sivjet është penguar nga pandemia. Një organizatë e quajtur “Unioni i Komiteteve për Punë Bujqësore” i ka ndihmuar 44 fermerë për të mbjellur mbi 5.000 trupa ullinjsh gjatë dy muajve të kaluar në periferi të qytetit Nablus.
“Njësia jonë ligjore i dokumenton të gjitha shkeljet përmes raportimit mujor, i ndjek ato ligjërisht së bashku me partnerët tanë dhe organizatat ndërkombëtare për të drejtat e njeriut”, thotë Moyaad Bsharat, drejtor i projekteve në këtë organizatë.
Ai thotë se sipas vlerësimit të organizatës, nga viti 1967 janë nxjerrë me rrënjë mbi 2 milionë trupa pemësh. Për ta rënduar gjendjen edhe më shumë, ndërtesat industriale në Burkan po i derdhin mbetjet kimike drejtpërdrejt në fushat e ullirit afër fshatit Salfit, duke i dëmtuar edhe më shumë ullinjtë.
