Zelensky mesazh Rusisë: Nëse sulmoni, do merrni të njëjtën përgjigje

Presidenti ukrainas, Volodymyr Zelensky, paralajmëroi të premten se Rusia do të përballet me kundërpërgjigje nëse sulmon sistemin energjetik të Ukrainës gjatë këtij dimri, transmeton Anadolu.

“Rusia e di se nëse sulmon – dhe ajo po përgatitet të godasë sistemin tonë energjetik këtë dimër – Rusia do të marrë të njëjtën përgjigje”, shkroi Zelensky në platformën sociale amerikane X. “Nëse na shkaktojnë ndërprerje të energjisë elektrike, ne do të përpiqemi të përgjigjemi në mënyrë të përshtatshme”, shtoi ai.

Zelensky tha se negociatat mbeten rruga e preferuar e Ukrainës për t’i dhënë fund luftës.

Ai bëri thirrje për përparim drejt një takimi të mundshëm trepalësh mes Ukrainës, Rusisë dhe Shteteve të Bashkuara, vendosjen e një armëpushimi në sektorin energjetik, zhbllokimin e Detit të Zi dhe vazhdimin e shkëmbimeve të të burgosurve dhe civilëve, përfshirë fëmijët e mbajtur në Rusi.

Zelenskyy paralajmëroi se zgjatja e luftës paraqet sfida për Rusinë dhe ekonominë globale, veçanërisht për sigurinë ushqimore dhe energjetike, dhe tha se ndërprerjet e eksporteve të drithërave përmes Detit të Zi mund të përkeqësojnë mungesat në vendet e cenueshme.