Në faqen e Komisionit Qendror të Zgjedhjeve tanimë janë publikuar rezultatet e numërimit të votave 100 për qind. Por, ankesat e disa partive dhe evidentimi i parregullsive ka bërë që sot të rinumërohen 303 vendvotime. Një rast të mospërputhjes të formularit me të dhënat e KQZ-së e ka raportuar sot edhe Haxhi Xhemajli.
Ishte fillimisht Partia Demokratike e Kosovës, mandej edhe Lidhja Demokratike e Kosovës dhe Nisma Socialdemokrate që kanë paraqitur ankesa në PZAP, sa i përket numërimit të votave të zgjedhjeve të 6 tetorit.
Këto parti pretendonin se mes tjerash janë bërë gabime në shtypjen e rezultateve.
Pas shqyrtimit të ankesave, Komisioni Qendror i Zgjedhjeve ka vendosur për rinumërimin e 303 vendvotimeve, bazuar në rekomandimin edhe të Qendrës së Numërimit dhe Rezultateve, e cila ka evidentuar një gabim teknik që ka ndodhur me shtypjen e gabueshme te formularëve.
Se kanë ndodhur gabime e mospërputhje në rezultate po raportojnë çdo ditë vëzhgues e persona që kanë qenë të angazhuar në procesin zgjedhor.
Një rast të tillë e ka raportuar edhe Haxhi Xhemajli, i cili tha se votat që janë dhenë në fshatin Abri të Epërme të Drenasit i janë hequr Partisë Demokratike të Kosovës.
“Rastësisht sot e mora formularin e përputhjes se të dhënave dhe rezultateve në Qendrën e votimit nr 0307E/02D në Abri të Epërme. Rezultati i publikuar në KQZ ishte dallimi -30 vota për PDK . Në formular janë 173, kurse në faqen e KQZ-së 143”, ka treguar ai.
Këtë që thotë, Xhemajli e ka treguar edhe me dokumente, ku shihet se PDK në formularë ka më shumë vota e në rezultatet e fundit të publikuara nga KQZ më pak./FaktePlus
Për më shumë shihni formularin dhe të dhënat e publikuara nga KQZ.
