Një serb është vrarë në atë që po konsiderohet si një ekzekutim në qytetin Johanesburg të Afrikës së Jugut, shkruan Buissines Insider South Africa.
Kjo është vrasja e gjashtë me radhë e një serbi në këtë qytet të madh në Afrikën e Jugut.
Ivan Djordjevic, 59 vjeçar u qëllua disa herë teksa po ngiste veturën e tij Mercedes Benz. Ai u qëllua nga dy persona të maskuar të cilët nga kamerat shihet se e kishin ndjekur me makinën e tyre BMW.
Në pamjet e kamerave shihet incidenti i plotë, teksa dy personat e maskuar qëlluan drejt Djordjevicit, i cili pas të shtënave del nga makina dhe mundohet të ikë por pastaj qëllohet për vdekje.
Në vendin e ngjarjes janë gjetur gëzhoja të 26 plumbave. Vrasësit u larguan me makinën e tyre, dhe pastaj e kishin djegur atë në një fushë të hapur kilometra larg.
Serbi, i cili tash kishte gati një dekadë që jetonte në Afrikë të Jugut, i mbijetoi një atentati dy vite më parë.
Në mënyrë të njëjtë ishte vrarë edhe një ish-anëtar i gardës serbe në korrik të vitit të kaluar.
Djordevic ishte i njohur për lidhjet e tij me kriminelë të profilit të lartë në Serbi. Ai është mik i njohur me Dobrosov Gavric i cili kërkohet në Serbi për vrasjen e kriminelit të luftës Zeljko Raznatovic, i njohur më mirë si Arkani në vitin 2000. Gavric u vra në prillin e vitit të kaluar.
Dy serbë të tjerë që besohet që kishin lidhje me vrasjen e Arkanit, u qëlluan për vdekje gjatë muajve të fundit në Afrikën e Jugut. Të gjithë këta emra ishin të kërkuar nga autoritetet e sigurisë serbe.
Krimineli serb i luftërave në Kroaci, Bosnje dhe Kosovë, Zeljko Raznatovic Arkan, u vra në fillim të viteve 2000 në Beograd./Express/
