Shkruan Hafiz Gagica
Votuesit shqiptarë janë ngopur me udhëheqës të korruptuar dhe politikanë të shantazhuar!
Qytetarët i thanë PO ndryshimit, reformave ekonomike e ndërtimit të një shteti ligjor.
Me 06 Tetor 2019, elektorati ynë votoi për ndryshime të reja si dhe për largimin e pushtetarëve të korruptua. Qytetarët e Kosovës votuan për një erë të re, në skenën politike në Kosovë, për një qeverisje pragmatike, të çliruar nga oligarkët, të korruptuarit, nga uzurpuesit e pasurive nacionale të Kosovës.
Përveç tjerash, zgjedhjet e 6 tetorit, ishin një çlirim emancipues, për votuesit e zënë peng nga liderët e partive klienteliste, të shantazhuar nga grupet e interesave klanore.
Ky ishte po ashtu edhe një vendim kyq për de-monizmin e udhëheqësve pushtet mbajtës të cilët partinë dhe shtetin e konsideruan pronë private dhe të cilët vendimet i harmonizonin me interesat personale.
Këto zgjedhje dhanë një rezultat shumë pozitiv për shtetin dhe shoqërinë tonë. U hap rruga që tani e tutje të ecim mbarë e më të sigurt drejtë ndryshimeve, riparimeve të keqqeverisjes së shkuar, duke u angazhuar për një shtet-ndërtim të mirëfilltë; Duke marr secili përgjegjësinë e tij individuale e kushtetuese për zhvillimin e vendit dhe krijimin e kushteve të barazisë, ligjit dhe të drejtave të barabarta për secilin, pa dallime sociale e privilegje për klanet e deridjeshme.
Prandaj përpjekjet për të nëpërkëmbur verdiktin e popullit përmes pazareve politike (e jo vetëm atyre) do të jet një veprim i pafalshëm e i dëmshëm për vendin duke e penguar ndryshimin dhe vullnetin e qytetarëve për një të ardhme më të mirë, e më të dinjitetshme,të tillë siç e kanë merituar.
Stutttgart, 30.10.2019