Një arush prej pelushi ka bërë më shumë zhurmë se vetë debatet në shtëpinë e “Big Brother VIP”.
“Boli”, dhurata simbolike e Mateos për Brikenën, u kthye papritur në “protagonist” pasi Juela e hodhi dy herë në pishinë gjatë një momenti tensioni në lojë. Një gjest që brenda shtëpisë u pa si provokim, por jashtë saj prodhoi një efekt krejt tjetër, shkruan IndeksOnline.
Në vend të përplasjeve, situata duket se ka afruar familjet. Profili zyrtar i Mateos publikoi një postim dedikuar “Bolit”, ndërsa reagimi i parë erdhi pikërisht nga familja e Brikenës, që menaxhon Instagramin e saj.
Një zemër në komente mjaftoi për të ndezur aludimet për një raport të mirë mes tyre.
Biseda virtuale mori edhe më shumë vëmendje kur në komente u përfshi motra e Mateos, Kejsi. Me humor, ajo shkroi: “M’raftë pika e hallës për ty”, duke iu drejtuar arushit. Përgjigjja nga llogaria e Brikenës erdhi po në të njëjtën frymë: “Lum Boli për hallën”.
Nga një incident në pishinë, tek batutat me emoji në rrjete sociale – duket se “Boli” ka arritur të bëjë atë që shpesh loja nuk e bën: të krijojë ura komunikimi jashtë shtëpisë.
