Ka disa kompani që kanë krijuar uebsajte me video, duke rivalizuar kështu YouTube-in, edhe pse mund të themi me siguri që asnjë prej tyre nuk ia ka dalë. YouTube është akoma uebsajti më i përdorur nga njerëzit për të parë video në internet. Tani YouTube-it do të shtohet një tjetër rival. Ish-shefi ekzekutiv i kompanisë Hulu, Jason Kilar, ka nisur të shpërndajë ftesat për rivalin e tij të YouTube-it, Vessel.
Më parë, Vessel mund të përdorej vetëm nga krijuesit e tij, por tani kompania ka vendosur që të ftojë përdoruesit të testojnë shërbimin e saj. “Sot ne do të ftojmë përdoruesit të provojnë aplikacionin Vessel në pajisjet iOS (iPhone dhe iPad) dhe në ueb (të gjithë laptopët dhe kompjuterët desktop). Së shpejti ne do të realizojmë Vessel-in për pajisjet Android.”
Nëse doni të provoni këtë aplikacion, mund të klikoni tek faqja ueb e kompanisë, dhe të lini adresën e email-it për të marrë një ftesë. Për momentin shërbimi është falas, por më vonë përdoruesit do të duhen të paguajnë 2.99 dollarë në muaj nëse duan të vazhdojnë të shohin video, raporton krokodili.al
