Kryetari aktual i Kuvendit të Kosovës, Dimal Basha, është vënë në qendër të një debati publik pas daljes në pah të një punimi të tij akademik të vitit 2012, i shkruar në gjuhën angleze, në të cilin UÇK-ja përshkruhet me terma që kanë nxitur reagime të ashpra në opinionin publik dhe politik.
Në punimin në fjalë, Basha ka bërë disa pretendime serioze për përbërjen dhe financimin e Ushtrisë Çlirimtare të Kosovës gjatë luftës së viteve ’90, raporton lajmi.net
Në mesin e deklarimeve më të debatueshme janë:
“UÇK-ja përbëhej edhe nga ‘banditët patriotikë’ dhe ‘kriminelët’…”
“Ushtria Çlirimtare e Kosovës gjatë ngritjes së saj bashkëpunoi me kriminelët shqiptarë brenda dhe jashtë Kosovës”
“UÇK-ja u financua nga ‘trafikantët e drogës’…”
“Ka raste të njohura nga Gjykatat në Gjermani, Itali, Belgjikë dhe Republikën Çeke, që fuqishëm mbështesin lidhjet mes trafikantëve të drogës dhe UÇK-së”.
Rikthimi i këtij publikimi ka ngjallur reagime të ashpra nga figura të ndryshme politike dhe shoqëria civile, të cilët e kanë cilësuar punimin si denigrues ndaj vlerave të luftës çlirimtare dhe si një goditje ndaj një prej simboleve më të rëndësishme të shtetformimit të Kosovës – UÇK-së./Lajmi.net/
