Flamujt në Mitrovicën Jugore janë në gjysmështizë. Është ditë zie në qytetin ku një natë më parë humbi jetën 28 vjeçari, Visar Behrami. Ai po punonte në këtë objekt kur i njëjti u shemb dhe zuri brenda të riun nga Mitrovica.
Kjo ngjarje e tmerrshme ka prekur të gjithë, por dhimbja më e madhe është tek familja e të ndjerit, Behrami.
Vendi ku ndodhi tragjedia, ka mbetur ashtu si një natë më parë.
Puna është ndërprerë, kurse pronarët janë arrestuar.
Megjithatë ekipi i televizionit merr vesh se i ndjeri ka punuar pa kontratë, derisa punëdhënësi nuk ka asnjë kompani të regjistruar.
Pra ka qenë një grup i punëtorëve krahu.
E ky objekt nuk kishte as leje për të kryer punime. Sipas komunës puna në ish hotelin “Adriatiku” bëhej gjatë vikendit.
Ndërkohë për këtë rast janë nën arrest dy persona, pronari i objektit dhe punëdhënësi. Prokuroria në Mitrovicë thotë se ende janë në gjurmë të rrethanave që dërguan deri tek ky rrënim.
Në anën tjetër televizioni mëson se pronari i këtij objekti është Ismet Osmani i njohur me nofkën “Curri”.
